மனதுக்குப் பிடித்த கவிதைகள்

அழகியசிங்கர்  

ஒரு கவிதை படிப்பவருக்குப் புரிய வேண்டுமா? வேண்டாமா? இந்தக் கேள்விக்கு ஒரு கவிதை வாசிப்பவருக்குப் புரிய வேண்டும் என்று நான் அழுத்தமாகக் கூறுவேன்.  பிரம்மராஜன் கவிதைகள் அவ்வளவு எளிதாகப் புரியாது.  இதை பிரம்மராஜன் காதுபட சொல்லாதீர்கள் என்று என் நண்பர்கள் சிலர் சொல்வார்கள்.  காரணம். நான் சொல்வதைக் கேள்விப்பட்டு பிரம்மராஜன் பெருமிதம் அடையக் கூடும் என்றுதான்.   ஆனால் உண்மையில் பிரம்மராஜன் கவிதை அவ்வளவு சுலபமாகப் புரியாது.  ஒவ்வொரு வரியாக புரியும்.  ஆனால் முழு கவிதைக்குள் போவதற்குள் பெரிய பாடாக இருக்கும்.  முபீன் சாதிகா கவிதைகளும் அப்படித்தான்.   கவிதை எப்படி எழுத வருகிறது என்று ஒருமுறை அவரிடம் கேட்டேன்.  தானாகவே எழுதுகிறது என்பது போல் சொன்னார்.  என்னால் நம்ப முடியவில்லை.   ஆட்டோமெடிக் ரைட்டிங் மீது எனக்கு நம்பிக்கை கிடையாது. அதுமாதிரி உண்டா என்பதும் தெரியாது.  அன்பின் ஆறாமொழி என்ற தலைப்பில் எழுதப்பட்ட இந்தக் கவிதையை எடுத்துக்கொண்டால், முதலில் தலைப்பு அவருக்குத் தோன்றியதா?  அல்லது கவிதை வரிகள் முன்னதாக தோன்றியதா?  எது தலைப்பை தீர்மானித்தது? இந்தக் கேள்விக்கு எனக்குப் பதில் தெரியவில்லை.  ஆனால் இக் கவிதையை வாசிக்கும்போது இதன் ரிதம் என்னை ஆச்சரியப்படுத்துகிறது. 

59)  அன்பின் ஆறாமொழி

முபீன் சாதிகா 

மீன் படரும் நீரிலும்

கருமை புகா வானிலும்

தொட்டுணரா தீயிலும்

பிளவு காணா கல்லிலும்

வருந்தும் வருந்தா வளியிலும்

நகையோடு பகையும் துயரிலும்

மெலியதில் வலியாய் மலரிலும்

நேரில் எதிரா திசையிலும்

முகம் கலக்கும் ஆடியிலும்

முற்றோடு சுவையாய் அமுதிலும்

முறிவோடு சுவையாய் அமுதிலும்

முறிவோடு தூண்டா நஞ்சிலும் 

ஒளிபுகா திரையின் இருளிலும்

அடரும் வெளியாய் கானிலும்

தளிரோடு துளிரும் முளையிலும்

முழுமையின் உருவாய் அண்டத்திலும்

விரைந்துழலும் ஒளியிலும்

ஒடுக்கும் துடியின் இடியிலும்

பொழிவில் வெருளா புயலிலும்

திரளும் தீரத்தின் பிணியிலும்

எம்மில் மாறா எச்சத்திலும்

நிச்சயமில்லா நிதர்சன நேசத்திலும்

தீரா வெகுளலலின் இறுதியிலும்

நிறையுமேûô நெறியின் நசை

நன்றி : அன்பின் ஆறாமொழி - கவிதைகள் - முபீன் சாதிகா - வெளியீடு : பாலம் பதிப்பகம் பி விட், 25 அபிராமி அபார்ட்மெண்ட்ஸ்,  3வது பிரதான சாலை, தண்டிஸ்வரர் நகர், வேளச்சேரி, சென்னை 42

முதல் பதிப்பு : நவம்பர் 2011 - விலை : ரூ.60.