மனதுக்குப் பிடித்த கவிதைகள் - தொகுதி - 2 - 123

அழகியசிங்கர்  

நடுமதியத்தில்

தூரன் குணா                                                                   

நடுமதியத்தில் 

புகைவண்டி நிலையத்தின் 

நடைபாதைக்கூரையின் கீழ் 

முன் நாற்காலியில் 

கருநிற முதுகு 

பாதி தெரிய 

உயரக்கொண்டை இட்டிருந்தவளின் 

அடர்வண்ண 

பூச்சணிந்த நீளநகங்கள் 

பின் நீண்டு

தண்டுவடக் குழிவில் 

ஒட்டியிருந்த 

என் கண்களைப் பிடுங்கி 

தண்டவாளங்களுக்கிடையில் 

எறிந்தன

வெயிலில் நெளியும் தண்டவாளங்கள் 

அதிரத்தொடங்கிய முதல் நொடியில்

கீழொன்றும் மேலொன்றுமாய் 

பிணைந்து பறந்த வண்ணத்துப்பூச்சிகளை 

கண்ட காட்சியை 

கடைசி முறையாய் 

நினைவிலிருந்து மீட்டிவிட்டு 

அணையத்துவங்கின கண்கள். 

நன்றி : கடல் நினைவு - தூரன் குணா - வெளியீடு : தக்கை - 15 திரு.வி.க சாலை, அம்மாப்பேட்டை, சேலம் 3 - முதல் பதிப்பு : ஜøலை 2012 - விலை : ரூ.35 - பக்கங்கள் : 80