காதலர் தினம் என்றால் என்ன.......

அழகியசிங்கர்

நான் இதுவரை
காதலர் தினத்தன்று
எந்தப் பெண்ணையும் காதலிக்க
வேண்டுமென்று நினைத்ததில்லை
காதல் என்பதே ஒரு அபத்தமென்றும்
அந்த அபத்தத்திலும் அபத்தம்
காதலர் தினம் என்று நினைப்பதுண்டு

நான் நடமாடும்
பூங்காவில்
தினமும் காலையில்
ஒரு ஜோடி கைக்கோர்த்து
தங்களை மறந்து நடந்தபடியே செல்வார்கள்
அவர்கள் இருவரும் காதலர்கள் என்றாலும்
அந்தப் பெண் முகம் மட்டும் தினம் தினம்
பார்க்கும்போது பூரணமாக ஒளிர்வதைக் காண்கிறேன்.

பின்
நான் அவர்களைப் பார்க்காத மாதிரி
நடந்து சென்று விடுவேன்.