வித்தியாசமான காலண்டர்

அழகியசிங்கர்

என் நெடுநாளைய நண்பர் டாக்டர் பாஸ்கரன் அவர்கள்.  சமீபத்தில் அவர் எழுதிய அது ஒரு கனாக் காலம் என்ற புத்தகத்திற்கு ஒரு ஸ்டார் ஓட்டலில் விருந்து அளித்து புத்தக வெளியீட்டு விழா நடத்தினார்.  100 பேர்களுக்கு மேல் கலந்து கொண்டார்கள்.  என்னை மேடையில் உட்கார வைத்து அவர் புத்தகத்தைப் பற்றி பேச சந்தர்ப்பம் கொடுத்தார்.  நானும் அப் புத்தகத்தைப் படித்து கட்டுரை வாசித்தேன்.

இதுவரை ஒரு சிறுகதைத் தொகுப்பும், இரண்டு கட்டுரைத் தொகுப்பும், மருத்துவம் சார்ந்த புத்தகங்களையும் கொண்டு வந்திருக்கிறார்.  ஒவ்வொரு புத்தகம் வரும்போது அதை வெளியிடும்போது உற்சாகமாகக் கொண்டாடுவார். விருந்தினர்களை உபசரிப்பதில் அவருக்கு நிகர் யாருமில்லை.  

இன்றைய காலக்கட்டம் மெச்சும்படி இல்லை.  இதுமாதிரியான சந்தர்ப்பத்தில் விழா கொண்டாடி கொண்டாடும் டாக்டர் பாஸ்கரனை யாரும் வாழ்த்தாமல் இருக்க மாட்டார்கள்.

வெள்ளிக்கிழமை அன்று (07.09.2018) டாக்டரைப் பார்த்தேன்  கையில் ஒரு காலண்டர் கொடுத்தார்.  அந்த காலண்டர் செப்டம்பர் 2018லிருந்து அடுத்தவருடம் ஆகஸ்ட் 2019 வரை உள்ள காலண்டர்.  அந்தக் காலண்டரின் முக்கியத்துவம் என்னவென்றால், அவருடைய விழாவிற்குக் கலந்துகொண்ட அத்தனைப் பேர்களையும் புகைப்படம் எடுத்து ஒவ்வொரு மாதம் வெளியிட்டிருந்தார்.  என்னுடைய புகைப்படமும் அந்தக் காலண்டரில் இருந்தது.  எப்போதும் பாதுகாக்கப்பட வேண்டிய காலண்டராக எனக்குத் தோன்றியது.