Skip to main content

பூனைகள் பூனைகள் பூனைகள் 22


திருட்டுப் பூனை


எல்லோருக்கும் உரியது

எல்லாம் என்று

எண்ணி இயங்குகிற

பூனைக்கு கிட்டியப் பெயர்

திருட்டுப் பூனை.

திருடாத பூனைக்கும்

உண்டு இப்பட்டம்.

இன்னொரு இனத்தால்

இடப் பட்ட

ஈனப் பெயர்.

இரையாகிற

எலிகள் கூட

நம்புகிறபோது

இவர்களுக்கு மட்டும்

திருட்டுப் பூனை.

கட்சித்தொண்டனாய்

தீக் குளித்தும்

காட்ட முடியாது அதற்கு

அதன் விசுவாசத்தை.

பாவம் விசுவாச அரிதாரம்

பூசத் தெரியாத

விழிகளுடன்

பதுங்கி பதுங்கி வாழும்

பரம சாதுவாய்

திருட்டுப் பூனை

Comments